Muri Musanze hagiye kubakwa imihanda mishya no gutunganya ruhurura

Abaturiye Umujyi wa Musanze barishimira ko ikorwa ry’imihanda ikomeje kwiyongera muri uyu Mujyi ari ingirakamaro ku iterambere ryabo, cyane ko ikomeje koroshya ubuhahirane no gukemura ikibazo cya ruhurura zuzuraga amazi akabangirizaga ibintu.

Ni mu gihe muri uyu Mujyi hagiye gukomeza icyiciro cya gatatu cyo kuwutunganya, hubakwamo imihanda ya kaburimbo no gutunganya ruhurura.

Bamwe mu baturage bo mu Mujyi wa Musanze, baragaragaza ko bari babangamiwe n’imwe mu mihanda idakoze na ruhurura zabangirizaga ibintu.

Ibibazo by’aba baturage bigiye gukemurwa n’icyiciro cya gatatu cyo gutunganya Umujyi wa Musanze, nk’Umujyi wunganira Kigali Phase III Rwanda Urban Development kigizwe n’ibirometero 6.8 n’Ikirometero kimwe cyo gutunganya ruhurura ya Susa.

Ni gahunda Leta y’u Rwanda irimo guterwamo inkunga na Banki y’Isi.

Imirimo yo gutunganya ibi bikorwaremezo izatangirana n’ukwezi kwa Gatanu uyu mwaka, ikazamara umwaka umwe.

Bizuzura bitwaye miliyari 9 z’amafaranga y’u Rwanda.

Ibice bibiri bibanza byari bigizwe n’imihanda ya kaburimbo ireshya na kilometero 11,4 n’ibirometero 2,5 byatunganijwe kuri ruhurura.

Uwimana Emmanuel