Muri Musanze hari abagore barara ijoro bakora isuku mu mihanda

Abagore barara ijoro bakora isuku mu mihanda yo mu mujyi wa Musanze, bavuga ko ari umurimo usaba ubwitange kandi ubatunze.

Ni mu masaha y’i Saa Sita z’ijoro, RBA yasuye umuryango wa Nyirambarushimana Velena atuye ahazwi nko kuri Karisimbi mu nkengero z’Umujyi wa Musanze. 

Uyu mubyeyi w’abana batatu, twasanze amaze kwitegura kugira ngo yerekeze ku kazi akora ko gusukura imihanda. 

Muri iryo joro aho benshi baba basinziriye, uyu mugore w’imyaka 47 ava iwe yerekeza aho akorera, anyura mu nzira ubona ziteye ubwoba.

N’ubwo aba bagore baba barashiritse ubwoba iyo bagenda n’ijoro mu mihanda, hari ubwo bahura n’abagizi ba nabi bakabambura utwabo.

Velena kuva iwe ajya aho akorera akazi ko gusukura imihanda, akoresha urugendo rugera mu isaha n’amaguru.

Akora isuku ku muhanda mugari Kigali-Musanze-Rubavu, kuva hafi saa saba z’ijoro kugera mu ma saa mbiri z’igitondo.

Ahembwa hakurikijwe imibyizi yakoze, kubera ko ariho bakura amaramuko birinda gusiba akazi.

Velena na bagenzi be bavuga ko aka kazi ko gusukura imihanda kabatunze, icyakora ngo inoti y’igihumbi bakorera ku munsi ni make.

Umuyobozi wa Koperative y’abakubura mu mujyi wa Musanze, Nyirabageni Belancilla avuga ko iki kibazo cyagejejwe ku buyobozi bw’akarere kuva 2015.

Abakoresha umuhanda nabo bagaragaza ko ari inshingano za buri wese kubungabunga isuku yo ku mihanda.

Mu bakora isuku, bamwe barara ijoro abandi bagakora amanywa, mu mafaranga make bahembwa nibo bigurira ibikoresho bakaba bifuza ko ababishinzwe bazasuzuma uko imikorere yabo yarushaho kunozwa.

Mbarushimana Pio