Musanze: Ibikorwa by'urubyiruko rw'abakorerabushake bifite agaciro karenga miliyoni 18Frw

Yanditswe Jan, 22 2023 13:05 PM | 4,337 Views

Mu karere ka Musanze urubyiruko rw'abakorerabushake ruravuga ko rwiyemeje kugira uruhare mu gukora ibikorwa bizamura imibereho myiza y’abaturage rutiganda, nk’umusanzu warwo mu kubaka igihugu.

Hashize amezi atandatu uruyiruko rw’abakorerabushake mu Karere ka Musanze rusinyanye imihigo 21 y’amezi 12 n’ubuyobozi bw’Akarere igamije guteza imbere imibereho, imyumvire n’ubukungu by’abaturage. Kugeza ubu urwo rubyiruko rwishatsemo ubushobozi rwubakira abaturage batanu batishoboye inzu zo kubamu, abandi rububakira imirima y'igikoni n’ubwihererero, rufasha mu bikorwa byo guhangana n’abakora ubucuruzi bw’iyobyagwenge, gusubiza abana mu ishuri n'ibindi bikorwa bifite agaciro ka miliyoni zisaga 18 z'amafaranga y'u Rwanda. Bavuga ko ari ibikorwa bikomoka ku rukundo rw’igihugu.

Umuyobozi w'Akarere ka Musanze Ramuri Janvier avuga ko uwo muco w'ubwitange utanga umusanzu mu kwesa n’imihigo y'Akarere.

Kubana Richard, Umuyobozi mukuru muri Minisiteri y'Ubutegetsi bw'Igihugu ushinzwe ibikorwa by'urubyiruko rw'abakorerabushake, yarusabye gukomeza gushyira imbere imyitwarire myiza, mugihe bakora ibyo bikorwa.

Kugeza ubu mu Karere ka Musanze habarurwa urubyiruko rw'abakorerabushake basaga ibihumbi umunani na magana atandatu (8600), bakaba biganjemo abarangije amashuri yisumbuye na kaminuza.