Ndizeye Samuel wa Police FC yahagaritswe amezi 6 muri ruhago y’u Rwanda

Myugariro wa Police FC, Ndizeye Samuel, yahagaritswe amezi atandatu adakina kubera gusagarira umusifuzi nyuma y’umukino ikipe ye yatsinzwemo na Sunrise FC ibitego 2-1, kuri Stade ya Nyagatare tariki 14 Mutarama 2024.

Icyemezo gihagarika uyu mukinnyi mu bikorwa byose bya ruhago y’u Rwanda mu gice cy’umwaka cyatangajwe n’Ishyirahamwe rya Ruhago mu Rwanda, FERWAFA, mu itangazo ryashyize hanze kuri uyu wa Gatanu, tariki ya 9 Gashyantare 2024.

Ni icyemezo cyafashwe na Komisiyo yigenga Ishinzwe Imyitwarire muri FERWAFA aho yanamenyesheje ko uyu Murundi Ndizeye Samuel yemerewe kukijurira mu gihe cyagenwe n’amategeko.

Itangazo rivuga ko icyemezo cyafashwe mu rwego ‘‘rwo gukomeza kwimakaza ituze mu bikorwa by’umupira w’amaguru.’’

Ndizeye Samuel yaguzwe na Police FC mu mpeshyi y’umwaka ushize wa 2023, avuye muri Rayon Sports.

Kuva umukino wo ku wa 14 Mutarama 2024, Ndizeye yasagariyemo umusifuzi ubaye, ntarongera kugaragara mu kibuga mu marushanwa ikipe ye yitabiriye arimo Shampiyona y’u Rwanda, Igikombe cy’Intwari [ikipe ye yegukanye itsinze APR FC ibitego 2-1] no mu Gikombe cy’Amahoro.