Nyanza: Abatuye i Ntyazo bavuga ko kotsa imyaka bigiye kuba amateka

Abatuye mu Murenge wa Ntyazo mu Karere ka Nyanza baravuga ko ubuhunikiro bw’imyaka babubakiye muri uyu murenge ari kimwe mu bizabafasha gukemura ikibazo cya bamwe mu baturage botsaga imyaka, ugasanga bahora bataka ibura ry'ibiribwa bitewe n'abamamyi babunamagaho bigatuma rimwe na rimwe bagurisha imyaka ikiri mu mirima.

Umurenge wa Ntyazo ni umwe mu yigize agace kazwi  nk’amayaga. Muri iki gice iyo imvura yabonetse neza kandi ku gihe, abahinzi baho beza ku bwinshi ibigori, amasaka ndetse n’ibishyimbo. Gusa ngo usanga akenshi abaturage bataka ikibazo cy'ibiribwa bidahagije bitewe no kugurisha imyaka yabo imburagihe.

Ndimubandi Diogène na Mutuyimana Adeline batuye muri uyu murenge,  bavuga  mu bihe byashize, akenshi ku mwero w'imyaka  ngo wasangaga abamamyi baza gushaka imyaka bagura ikiri mu mirima cyangwa, yanera ugasanga babahenda ibi ngo bikaba byaragiraga ingaruka mbi ku muhinzi bigatuma atabona ibyo kurya bihagije byo gutunga urugo rwe.

Mu gukemura iki kibazo muri uyu murenge hubatswe ubuhunikiro bugezweho. Abaturage bakaba bavuga ko bigiye kubafasha guhangana n’ikibazo cyo kubura ibiryo n’imbuto ibi bikazatuma iterambere ryabo rirushaho kwihuta.

Umunyamabanga Nshingwabikorwa w’agateganyo w’uyu murenge, Mungwarareba Emmanuel avuga ko ugereranyije n’abahinzi bafite, ngo haracyakenewe ubundi buhunikiro muri uyu murenge, bakaba bafite gahunda yo kubaka n’ubundi kuburyo buri kagari kazagira ubuhunikiro bwako.

Ubu buhunikiro bufite ubushobozi bwo kwakira umusaruro ungana na toni 350, bukaba bwaruzuye butwaye amafaranga y’u Rwanda miliyoni 28.

Jean Pierre NDAGIJIMANA