Pasiteri Niyonshuti Theogene uzwi nk'inzahuke yitabye Imana

Mu rukerera rwo kuri uyu wa Gatanu, Past Niyonshuti Theogene yapfuye azize impanuka y'imodoka.

Aganira na RBA, Umuvugizi wa ADEPR Rev. Past Ndayizeye Isaïe yavuze ko nyakwigendera yaguye mu mpanuka yabereye muri Uganda.

Muri iyi mpanuka, Pasiteri Theogene yari arikumwe n'abandi bantu batatu, babiri bahise bapfana na we naho undi umwe arakomereka bikabije. Kugeza ubwo twandikaga inkuru ngo yari ari kuri koma.

Pasiteri Theogene na bagenzi be ngo bari bavuye mu murimo w'Ivugabutumwa muri Uganda bagarutse mu Rwanda.

Azwhi cyane mu buhamya bwe bugaragaza uko yabayeho ubuzima bwo kumuhanda nyuma ya Jenoside, arangwa n'ibikorwa bibi aho avuga ko yakoreshaga ibiyobwange n'ubundi buzima bubi bwo ku muhanda, hanyuma nyuma akaza kwakira inkuru nziza ya Yesu Kristo agakizwa. 

Yabwirije benshi a=mu bo bari bafatanyije ubu buzima ndetse afasha no kurera abandi yavanaga ku muhanda. 

Apfuye asize umugore umwe n'abana bane. Yari azwi ku izina ry'inzahuke bitewe n'aho Imana yamukuye ndetse n'aho yari imugejeje.

Reba ibiganiro birimo ubuhamya Pasiteri Theogene yagiranye na RBA.