Perezida Kagame yagiranye ibiganiro n'abarimo umuyobozi wungirije muri Minisiteri y’Ubucuruzi mu Bushinwa

Perezida Paul Kagame yakiriye mu biri bye, Village Urugwiro, Tang Wenhong Minisitiri w’Ubucuruzi Wungirije mu Bushinwa, n’itsinda yari ayoboye, baganira ku buryo hakongerwa ingufu mu mubano n’ubufatanye mu nzego zinyuranye hagati y’ibihugu byombi. 

Tang Wenhong n’itsinda ayoboye bari mu Rwanda aho baje kwitabira inama ya 9 ya Komite ihuriweho y’ubufatanye mu bukungu n’ubucuruzi hagati y’u Rwanda n’igihugu cye.

Muri iyi nama havuzwe ko mu mwaka ushize wa 2023, ubucuruzi hagati y’u Rwanda n’u Bushinwa bwageze kuri miliyari zisaga gato 642 z’amafaranga y’u Rwanda, arizo miliyoni 500 z’amadolari y’Amerika, nk’uko byatangajwe n’inzego zishinzwe ubucuruzi n’ubufatanye hagati y’ibihugu byombi.

U Rwanda n’u Bushinwa bimaze imyaka isaga 52 bifitanye umubano wihariye mu nzego zitandukanye, ugamije guteza imbere abaturage b’ibihugu byombi.

Umukuru w’Igihugu kandi yanakiriye mu biro bye, Umunyamabanga wa Leta ushinzwe Ikigo cy’Abanya-Suède cy’Iterambere n’Ubutwererane Mpuzamahanga, Diana Janse, baganira ku kwagura ubufatanye mu bucuruzi n’ishoramari hagati y’u Rwanda na Suède.