Yanditswe Dec, 21 2019 13:22 PM | 2,119 Views
Mu nama Nkuru y’Umuryango
RPF Inkotanyi yateranye kuri uyu wa Gatandatu, Perezida wa Repubulika, Paul Kagame akaba na
Chariman w’uyu muryango yasabye abanyamuryango kwirinda guhishira abakora nabi
bitwaza ko babafitiye ubwoba.
Umukuru w’Igihugu yavuze ko bitumvikana uburyo umuntu abona undi akora nabi agaceceka, avuga ko atari ibintu bikwiye kuranga abanyamuryango ba RPF Inkotanyi.
Yagize ati “Umuntu agakora ikidakwiye, hari undi umuri iruhande amureba ntashobore kumubwira ati sigaho ntabwo ari ko bigenda; kandi ingaruka yabyo ntabwo ari ku muntu umwe gusa, iri ku bandi Banyarwanda benshi batazi ibyo uri gukora.”
Yunzemo ati “Gutinya kuvugisha ukuri, ukabwira umuntu uti ibi si byo wabitinya ute? Ikintu njya numva cya fear (ubwoba) ntacyo kivuze, waba utaratinye urugamba abantu bakomerekeyeho ukavuga ngo ubwoba, ubwo ni ubwoba nyabaki?”
Perezida Kagame yavuze kandi ko iyo umuntu abonye ikibi gikorwa akicecekera n’ubwo we yaba yumva ko nta kibi yaba akora, ngo ntabwo aba ari umwere na gato.
Ati “Uko wakireba kose ntabwo bikwiriye, kandi wowe ntabwo wakwicara inyuma ngo uvuge uti njye ndi umwere, njye ibyo bazambaza bazasanga ndi umwere, ntabwo uri umwere kubera ko wacecetse. Ntabwo waba umwere uceceka ukabona ibibi bikorwa, iyo ucecetse uba uri nka wa wundi, iyo ucecetse abiba bakiba, abica bakica ubareba, abajya kurobanura ku kazi agashyiraho inshuti ze ugaceceka, ntabwo uri umwere,uri nk’abo. Icyo utinya ni iki? Ubwoba ni iki? Abantu barahugutse batanga ubuzima bwabo none ngo umujura arakureba nabi?”
Iyi Nama Nkuru ya RPF Inkotanyi iteranye ku nshuro ya 14, Perezida Kagame yasabye abanyamuryango ko ari umwanya mwiza wo gusuzuma ibyakozwe, bagafata umwanya wo kureba ibitaragenze neza bakarushaho kubonoza.
Yagize ati “Umunsi nk’uyu ni ugusubiza amaso inyuma, uvutse akarerwa agakura akagira imyaka ageza, ni byiza ko asubiza amaso inyuma ukavuga uti mvuye he, ngeze he? Aho wavukiye, aho ugeze mu myaka; usubiza amaso inyuma ukavuga uti ariko intego, urugendo tugenze, tugeze he, twagenze urwo rugendo dute? Twasitaye kangahe, twaguye kangahe, twahagurutse kangahe? Ikibi ni ukugwa ugahera hasi […] ibyo ukabivanamo inyigisho ugahaguruka ugakomeza ugakora ibindi birenze ibyo wakoraga.”
Umukuru w’Igihugu kandi yanasabye abanyamuryango ba RPF Inkotanyi ko bakwiye gukora ku buryo abaharaniye iterambere ry’uyu muryango batazavuga ko ibyo barwaniye bagatangira ubuzima byahinduye isura.
Uretse abanyamuryango basaga 2000 bitabiriye iyi nama, yanatumiwemo n’abayobora indi mitwe ya politiki ikorera mu Rwanda.
Ubuhamya bw'abakinnyi barokowe na Siporo muri Jenoside yakorewe Abatutsi
Apr 19, 2024
Soma inkuru
REG BBC yisubije Thomas Cleveland Jr
Jan 19, 2024
Soma inkuru
Oscar Pistorius yafunguwe nyuma y'imyaka 11 ishize yishe uwari umukunzi we
Jan 05, 2024
Soma inkuru
Jurrien Timber myugariro wa Arsenal ari mu Rwanda muri Gahunda ya Visit Rwanda
Dec 14, 2023
Soma inkuru
Twitege iki kuri Tour du Rwanda 2024?
Nov 09, 2023
Soma inkuru
Amagare: FERWACY yabonye abayobozi bashya
Nov 05, 2023
Soma inkuru
Perezida Kagame yakiriye abegukanye ibihembo bya Trace Awards 2023
Oct 22, 2023
Soma inkuru
Car Free Day: Umujyi wa Kigali washimiwe kugira ibikorwaremezo byorohereza abagenda n'amaguru
Oct 15, 2023
Soma inkuru