Perezida Kagame yitabiriye inama ku ikoranabuhanga n'itumanaho muri Qatar

Perezida wa Repubulika, Paul Kagame Kuri uyu wa Kabiri, mu murwa Mukuru wa Qatar, Doha,  yitabiriye itangizwa ry’inama ku ikoranabuhanga n’itumanaho. Iyi nama yo ku rwego rwo hejuru mu gihugu cya Qatar ikomatanyije n’imurikagurisha ry’ibikorwa by’ifashisha ikoranabuhanga rigezweho mu gukemura ibibazo bitandukanye hanozwa serivisi ku batuye isi.

Umuhango wo gutangiza iyi nama witabiriwe n’abayobozi banyuranye barangajwe imbere na Emir w’iki gihugu cyo mu burasirazuba bwo hagati, Sheikh Tamim bin Hamad Al-Thani wari kumwe na Perezida, Paul Kagame.

Iyi nama ihuza abamurika ibikorwa by’ikoranabuhanga bagera kuri 300, imishinga 100 ikizamuka ndetse n’abahanga udushya kimwe na ba rwiyemezamirimo 300 ifite insanganya mastiko igira iti “Imijyi itekanye ikoresha ikoranabuhanga ritangiza ibidukikije.”

Abagera kuri 90 biteganyijwe ko batanga ibiganiro ku bayitabiriye mu gihe imurikagurisha bibangikanye ritenyanyirije hamwe impuguke mu bijyanye n’imijyi ifite ikoranabuhanga rigezweho ritangiza ibidukikije, barebera hamwe icya korwa mu gukemura imbogamizi zitandukanye zigaragara mu mujyi hifashishijwe udushya n’ikoranabuhanga rigezweho biteza imbere imijyi yo mu bihe biri imbere.

Imijyi ifite ikoranabuhanga rigezweho ritangiza ibidukikije ifatwa nk’igisubizo cy’imbogamizi zitandukanye ziterwa n’ubwiyongere bw’abatura mu mijyi hirya no hino ku isi mu gihe isi ikataje mu iterambere ry’ikoranabuhanga.

 Nkuko bigaragazwa n’urubuga rw’ihuriro ry’ubukungu ku isi (WEF), 65 ku ijana by’abatuye isi bazaba batuye mu mijyi mu 2040.

 Abitabiriye inama y’i Doha basanga hakenewe kwitabwa ku bushobozi, kuramba n’ireme ry’ubuzima hifashishijwe ibikorwa remezo, ikoranabuhanga mu itumanaho n’isakazabumenyi (ICT), imyubakire, umutungo, ibidukikije, uburwo bw’ubwikorezi na serivisi.

Ni ku nshuro ya mbere u Rwanda rwitabiriye iyi nama izwi nka QITCOM mu mpine y’amagambo y’icyongereza, aho bimwe mu bigo by’ikoranabuhanga byo mu gihugu nka AC Group, Ampersand, Broadband Systems Corporation, Irembo, Pascal Technology, QT Software n’umushinga mushya w’urubyiruko wo kunagura uzwi nka Wastezon biri mu bimurika ibikorwa byabyo. 

Paschal BUHURA