RIB yafashe abantu 7 bakekwaha ibyaha byo gushyiraho umutwe w’abagizi ba nabi no kuwujyamo

Kuri uyu wa Gatatu, Urwego rw’Igihugu rw’Ubugenzacyaha, RIB, rwerekanye abantu barindwi bashakishwaga ku byaha byo gushyiraho umutwe w’abagizi ba nabi no kuwujyamo, guhimba no gukoresha inyandiko mpimbano, no kwihesha ikintu cy’undi hakoreshejwe uburiganya.

RIB ivuga ko aba bantu bumvikanaga n’umucuruzi kumurangurira ibintu bakishyura amafaranga make kuri konti yabahaye, kugirango babone inyemezabwishyu ya banki.

Nyuma ngo bayihinduraga bakoresheje mudasobwa bakiyandikiraho umubare w’amafaranga ujyanye n’ibicuruzwa bumvikanye kwishyura.

Iyo nyir’ibicuruzwa yifuje kwishyurwa hakoreshejwe uburyo bwa Mobile Money, bamwohererezaga ubutumwa bwa MoMo bw’ubuhimbano.

Ivuga ko iyo atashishoje cyangwa ngo agire amakenga, yategekaga uri ku iduka ko bapakirira abo bantu. Ibi byose babikora vuba cyane kugirango badafatirwa mu cyuho.

RIB  yatangaje lko ikangurira abacuruzi kugira amakenga mbere yo gutanga ibicuruzwa, bakajya babanza kureba niba koko amafaranga y’ubwishyu yageze kuri konti zabo.