SENA yatoye Itegeko Nshinga ku mpinduka ku ngingo zirebana n’amatora y’Abadepite

SENA y’u Rwanda yatoye Itegeko Nshinga rya Repubulika y’u Rwanda, nyuma yo gukora ubugororangingo n’impinduka ku ngingo zimwe na zimwe by'umwihariko irebana n’amatora y’Abadepite.

Itegeko Nshinga rya Repubulika y’u Rwanda ryatowe n’inteko rusange ya SENA, nyuma yo gutora ingingo ku yindi ku zakorewe ubugororangingo ndetse n’izavuguruwe.

Visi Perezida wa Sena, Nyirasafari Esperance avuga ko nta mpinduka zihambaye zakozwe ku mushinga SENA yashyikirijwe n’umutwe w’Abadepite mu kwezi gushize.

Ikindi ni uko inyito ivuga ko ari Itegeko Ishinga rya Repubulika y’u Rwanda ryo muri 2003 ryavugurwe muri 2015 itazakomeza gukoreshwa, kabone nubwo ntacyahindutse ku irangashingiro ryemejwe n’abaturage muri 2003 ndetse na 2015.

Itegeko Nshinga rya Repubulika y’u Rwanda ryatowe n’inteko rusange ya SENA rizasubizwa mu mutwe w’Abadepite nawo uritore nyuma rishyikirizwe Perezida wa Repubulika nawe arishyireho umukono ribone gutangira kubahirizwa.

Uyu mushinga wo kuvugurura Itegeko Nshinga rya Repubulika y’u Rwanda watangijwe na Perezida wa Repubulika, ku mpamvu nyamukuru yo guhuza amatora y’abadepite n’aya perezida wa Repubulika.

Divin Uwayo