Turashima inshuti z’u Rwanda zatubaye hafi zikarwanya Jenoside-Perezida Kagame

AGEZWEHO


Turashima inshuti z’u Rwanda zatubaye hafi zikarwanya Jenoside-Perezida Kagame

Yanditswe April, 07 2017 at 12:51 PM | 1944 Views



U Rwanda rwashimye uburyo bimwe mu bihugu bya Afrika byagize uruhare mu kurwanya no guhagarika jenoside yakorewe Abatutsi mu Rwanda, n'ubwo andi mahanga yasaga n'ayabatereranye. Ibi byagarutsweho na Perezida wa republika Paul Kagame ubwo yayoboraga umuhango wo gutangiza icyumweru cyo kwibuka ku ncuro ya 23 jenoside yakorewe Abatutsi, umuhango ku rwego rw'igihugu wabereye ku rwibutso rwa Kigali ku Gisozi.

Perezida wa republika Paul Kagame na madamu Jeannette Kagame, bari kumwe na perezida wa komisiyo y'umuryango wa Afrika Musa Faki Mahamat batangije icyumweru cy'icyunamo cyahariwe kwibuka abazize jenoside yakorewe abatutsi mu Rwanda.


Ni umuhango waranzwe no kuba aba bayobozi bashyize indabo ku mva zishyinguyemo izi nzirakarengane, ndetse na perezida wa republika Paul Kagame wacanye urumuri rw'icyizere ruzamara iminsi 100 rwaka.


Perezida wa komisiyo y'umuryango wa Afurika yunze ubumwe Musa Faki, yavuze ko yifatanyije n'Abanyarwanda mu gahinda n'amarira, ashima ingufu n'ubudatsimburwa abaturage b'u Rwanda bagaragaza ku buryo usanga igihugu cyabo cyubashywe kandi kihagazeho mu ruhando rw'amahanga. Yashimye kandi imiyoborere ya perezida Kagame, yayoboye abanyarwanda ku kubabarirana no kongera kubaka igihugu cyabo bundi bushya. Yamaganye ibyabaye n'abakomeje guhakana, jenoside ikwiriye kwibukwa muri Afurika yose.


Naho perezida wa republika Paul Kagame mu butumwa bwe yagarutse ku ihagarikwa rya jenoside, n'ababigizemo uruhare harimo n'Abanyafurika, bahagaze bakanga ko abanyarwanda bakomeza kwicwa: “Muri ibi bihe kandi, twibuka tunashimira inshuti z’u Rwanda zatubaye hafi zikarwanya jenoside mu buryo butandukanye. Bamwe muri bo bari hano uyu munsi. Turabashimira. Mwiyemeje gushyigikira ukuri, mutitaye ku ngaruka byabagiraho. Ndagira ngo kandi nshimire abavandimwe bacu bo muri Afurika badushyigikiye mu bihe by’amahina. Ingabo zo muri Afurika, zari zaje kubungabunga amahoro, zasigaye hano, ubwo iz’ahandi zagiye, zishobora kurokora benshi. Umwe muri bo ni Umukapiteni wo muri Senegal, witwa Mbaye Diagne, wahasize ubuzima, ni umwe mu bo twubaha mu ntwari zacu”

Perezida Kagame kandi yatangaje ko bidakwiye ko kuri ubu usanga abantu bahugiye ku nyito yahabwa jenoside yakorewe abatutsi, aho gutekereza ku bayikorewe no kureba uko babayeho.

Umukuru w'igihugu yibukije ko u Rwanda rwabuze abantu basaga miliyoni bishwe mu buryo bwateguwe, nta kiza cyaje ngo kibahitane.

Yibukije kandi ko u Rwanda n'abanyarwanda bakeneye kubaho ubuzima bwabo uko babyumva, kandi mu buryo bahisemo ko bubanogeye. Gusa akemeza ko u Rwanda rwiteguye gukorana n'incuti zarwo n'abashaka gukorana narwo ndetse n'abumva bahinduka bakajya mu murongo rurimo batarusabye guhindura ibyo rwemera kandi rwahisemo.

Inkuru mu mashusho:



Ba wambere gutanga igitekerezo

Tanga igitekerezo:



RSS FEED

Perezida Kagame yatashye Ingoro Ndangamurage y'Urugamba rwo Guhagarika Jeno

Ministre mushya w'ikoranabuhanga n'itumanaho n'uw'uburezi ba

William Gelling avuga ko umubano w'u Rwanda n'Ubwongereza urushaho kub

Ubushakashatsi bwa TIR bwerekana ko polisi iri mu nzego zigaragaramo ruswa cyane

Hari ibihugu bititabira kohereza abakekwaho ibyaha bya Jenoside--Ubutabera

Polisi y'igihugu yataye muri yombi abantu 30 bakekwaho gutanga ruswa n'