Icyayi cy'u Rwanda cyinjije Miliyari 14 mu gihembwe cya mbere cya 2016

Raporo y’Ikigo cy’Igihugu gishinzwe kohereza mu mahanga ibikomoka ku buhinzi n’ubworozi (NAEB), iragaragaza ko mu gihembwe cya mbere cya 2016, umusaruro w’icyayi u Rwanda rwohereje mu mahanga ungana na miliyoni 18.8 z’amadorali, ni ukuvuga amafaranga asaga miliyari 14.9.

Iyi raporo yerekana ko umusaruro wikubye inshuro zigera hafi ebyiri ugereranyije n’amezi atatu ya mbere y’umwaka ushize kuko wari kuri miliyoni 7.1 z’amadolari ya Amerika.

Muri iyi raporo bigaragara ko mu mezi atatu ashize u Rwanda rwohereje icyayi kingana na n'ibiro 6,811,095. Uyu musaruro ukaba waraturutse ahanini mu gushishikariza abahinzi kongera umusaruro n’ubwiza bw’icyayi cy’u Rwanda.

Mu mwaka wa 2015 icyayi cy’u Rwanda cyoherejwe mu mahanga cyongereye agaciro ku kigero cya 40% n’ingano ku kigero cya 8.9%.

Banki Nkuru y’u Rwanda igaragaza ko umusaruro rusange mu mwaka ushize wabaye hafi miliyoni 73 z’amadorali ni ukuvuga miliyari 57.2 z’amafaranga y’u Rwanda, uvuye kuri miliyoni 52 z’amadorali muri 2014.