Perezida Kagame yashimiye ikipe y'igihugu y'abagore ya Basketball

Ku gicamunsi cyo kuri uyu wa Kane Perezida wa Repubulika Paul Kagame yahuye n'Ikipe y'Igihugu y'Abagore muri Basketball abashimira ko bageze muri kimwe cya kabiri cy'Igikombe cya Afurika muri Basketball.

Ni igikombe kirimo gukinirwa hano mu Rwanda kuva tariki 28 Nyakanga 2023, kikaba kizasoza tariki 5 Kanama 2023.

Imikino yose irimo gukinirwa muri Kigali Arena.

Ni ubwa mbere ikipe y'Igihugu y'u Rwanda igeze muri kimwe cya kabiri cy'imikino Nyafurika muri Basketball.

Iyi mikino yitabiriwe n'amakipe 12 y'ibihugu ariyo: u Rwanda rwakiriye iyi mikino, Nigeria, Cameroon, Uganda, Mali, DRC, Mozambique, Côte d'Ivoire, Egypt, Angola, Guinea na Senegal.

Amakipe yageze muri kimwe cya Kabiri akaba ari u Rwanda, Nigeria, Senegal na Mali.

Ubwo yahuraga n'Ikipe y'Igihugu, Perezida Kagame bamuhaye impano y'umwenda w'ikipe y'Igihugu wanditseho amazina ye.

Perezida Kagame kandi yakunze kwitabira iyi mikino mu gutera ingabo mu bitugu ikipe y'igihugu.

U Rwanda rwageze muri kimwe cya Kabiri nyuma yo gutsinda Uganda na Côte d'Ivoire.

Ikipe ya Nigeria niyo ifite igikombe giheruka ikaba iri no muzihabwa amahirwe yo kwegukana icy'uyu mwaka.

Perezida Kagame bamuhaye impano y'umwenda w'ikipe y'Igihugu wanditseho amazina ye. Photo: Urugwiro Village

Perezida Kagameyakunze kwitabira iyi mikino mu gutera ingabo mu bitugu ikipe y'igihugu. Aha yarebaga umukino wahuzaga u Rwanda na Angola. Photo: Urugwiro Village

Olivier Uwimana