U Rwanda ruratumiza ingano muri Brasil na Australia

Guverinoma y’u Rwanda itangaza ko ubu irimo gukura ingano mu bihugu 2 bya Brazil na Australia nka kimwe mu bisubizo ku izamuka ry'igiciro cy'ifarini ryari rimaze iminsi, ritewe n’intambara iri mu bihugu u Rwanda rwazitumizagamo. 

Intambara iri kubera muri Ukraine yashyizwe mu majwi cyane nk' intandaro yiri zamuka ry'igiciro cy'ifarini, ndetse n'igabanuka ry'ingano ku isi. 

Minisitiri w'Intebe Dr Edouard Ngirente avuga ku bufatanye bwa Leta n'abacuruzi, ubu habonetse ibisubizo by’aho gukura izindi ngano zikorwamo ifarini.

Ati "Tumaze kubona amasoko mu bihugu 2 Brasil na Australia kandi twatangiye gukurayo ingano, ikibazo kirimo aho ngaho ni urugendo rurerure kuko urumva byongere igiciro cy’urugendo ariko ingano y’ibyo twazanaga yo ntiyahindutse sinavuga ko dufite ikibazo cy'ibura ry'ingano, ikigoye ubwo ni igiciro cyo kubigeza mu Rwanda. "

Usibye igiciro cy'umugati n' ibindi bikorwa mu ifarini muri iyi minsi ku isoko hagaragaye n' izamuka ry' ibiciro by' ibiribwa muri rusange. 

Gusa Guverinoma y’u Rwanda itanga icyizere ko iki kibazo  gishobora gukemuka umwaka utaha kubera ko ubukungu bukomeje kuzahuka ku rwego rwiza.